Yolanda

Yolanda Jaen Gomez, joan den astean Iruñeko kale nagusiko bere etxean ustez haren bikoteak eragindako sute baten ondorioz erredurak jasandako 50 urteko emakumea, atzo hil zen Zaragozako Miguel Servet ospitaleko traumatologia unitatean. Sutearen ustezko egilea, 47 urteko Roberto Dominguez Domingo, Iruñeko espetxean dago astelehenetik, Emakumeen Aurkako Indarkeriaren Epaitegiaren erabakiz. Sutea eta hilketa edo homizidio saiakera dira hari egiten ari zaizkion ikerketaren oinarriak; orain, biktima hil ostean, saiakera izatetik delitu burutu izatera igaro da.

Jaiotzez Zalamea de la Serena (Badajoz) herrikoa zen Yolanda Jaen Gomez gertakarien egunean bertan, urriaren 16an, eraman zuten Zaragozako Miguel Servet ospitaleko erretakoen unitatera, larri zurituta, eta han egon da hil arte. Medikuak joan den astean lesioak arintzeko ebakuntza egiten saiatu zitzaizkion arren, osasun egoera ahularen ondorioz, atzeratu egin zuten ebakuntza.

Emakumearen Aurkako Indarkeria Epaitegiaren titularrak behin-behineko espetxealdi komunikatua eta fidantza gabea ezarri zion astelehenean Yolandaren bikotekide Roberto Dominguez Domingori, bizi ziren etxean gertaturiko sutearen ustezko egile izateagatik, poliziak Iruñeko Kale Nagusiko 55.ean zegoen etxeko sutea nahita eragindakoa zela adierazteko arrastoak aurkitu ostean.

Agenteek substantzia azeleratzaileak aurkitu zituzten etxean, eta laborategira bidali zituzten aztertzera. Gizona susmagarritzat jo zuten; hark ere erredurak zituen, batez ere eskuetan, baita emakume beraren aurkako indarkeria aurrekariak ere. Berez, ekainean amaitu zen urruntze agindua izan zuen urtebetez, eta 2013an espetxean izan zen.