Fátima

Polizia Nazionalak asteartean Los Pajaritos auzoko Carena kalean eraildako emakumearen bikotekide ohia atxilotu du. Poliziako iturriek ABCri berretsi diotenez, susmagarria ospitale batean atxilotu dute, bertara joan denean hainbat zauri sendatzera.

Ia aldi berean, Polizia Zientifikoko eta Hilketa Taldeko kideek ustezko hiltzailearen etxebizitza erregistratu zuten. Hildako emakumearen (Fátima) bikotekide ohia haren eraikin berean bizi da, Carena kaleko 3. zenbakian.

Biktimak salatua zuen ustezko hiltzailea, E.R.B. inizialak dituen 51 urteko espainiarra, baina ez zioten jarri ez urruntze agindurik, ez kautelazko neurririk. Atxilotuak aurrekariak zeuzkan, eta beste lau emakumeren salaketak ere jaso zituen, baita Kordoban bizi zen bikotekide ohi batengandik urruntzeko agindua ere.

Los Pajaritoseko biktima goizeko zortziak pasatxo hil zen, sastakatuta, bere eraikineko eskailera buruan; bere bi seme-alaba adingabeekin bizi zen bertan.

Polizia Zientifikoko eta Hilketa Taldeko kideak arduratu dira kasua ikertzeaz, eta asteartean, lehen orduan, susmagarriaren etxebizitza erregistratu zuten, krimena hark egin duela adierazten duten frogen bila. Iturri berberek berretsi dute pisuan ez zegoela inor. Arratsaldeko ordu bata pasatxo gertatu zen hori, aginte judizialak gorpua jasotzea agindu ostean. 8:48ak aldera jaso zuten abisua 112 zerbitzuan. Biktimaren seme nagusiak larrialdi zerbitzuei dei egin zien, ama eskailera buruan sastakatu zutela ohartarazteko. Bizilagun batzuek adierazi dutenez, hamabi urteko mutikoa erasoaren lekuko izan zen. Beste iturri batzuen arabera, aldiz, amaren oihuak entzun zituenean atera zen eskailerara, eta orduan dei egin zien larrialdi zerbitzuei.

Biktimak 36 urte zituen, eta bederatzi urteko alaba eskolara eramatetik bueltan zetorren. Hasiera batean, poliziakideak biktimaren ingurune pertsonal hurbilekoenean ikertzen hasi ziren, baina behin susmagarri nagusia atxilotuta berretsi du poliziak indarkeria matxistaren beste kasu bat izan daitekeela. Seme-alabak aurretik izandako beste bikotekide batenak dira. Emakumea ezkondu egin zen harekin, eta une honetan gizon hori espetxean dago. Hura ere salatu zuen indarkeria matxistagatik, eta Sevillako Udaltzaingoak babes neurriak ezarri zizkion biktimari.